„Mér finnst ekki mitt að svara fyrir hvað hún gerir“

Nokkur umræða hefur spunnist um laun Heiðu Bjargar Hilmisdóttur borgarstjóra að undanförnu. Heiða er með um 3,8 milljónir í mánaðarlaun. Þar af eru 870 þúsund krónur á mánuði fyrir formennsku í Sambandi íslenskra sveitarfélaga. Heiða hefur enn ekki tekið ákvörðun um hvort hún muni veita stjórn sambandsins áfram formennsku eftir að hafa nú tekið við embætti borgarstjóra. 

Verkalýðsforkólfar hafa gagnrýnt há laun Heiðu. Þeirra á meðal er Vilhjálmur Birgisson, formaður Verkalýðsfélags Akraness. Hann skefur ekki af hlutunum og segir „helvíti vel í lagt“ að borgarstjóri sé með tæpar fjórar milljónir á mánuði. Sólveig Anna Jónsdóttir formaður Eflingar hefur sagt „brjálæðislegt“ að sjá laun borgarstjóra, sem séu sexföld á við laun launalægstu kvenna sem starfi hjá borginni.

Á sömu launum frá borginni og Einar

Sanna Magdalena Mörtudóttir, forseti borgarstjórnar og oddviti Sósíalistaflokksins, ræddi málið í Reykjavík síðdegis á Bylgjunni fyrr í dag. Þar benti hún á að laun fyrir formennsku í stjórn Sambands íslenskra sveitarfélaga væru ekki ákveðin á vettvangi borgarinnar. 

„Í raun er borgarstjóri þá núna með sömu laun og fráfarandi borgarstjóri,“ sagði Sanna, og vísaði þar til Einars Þorsteinssonar.

Það sé ekkert leyndarmál að hún og Sósíalistar hafi haft skoðanir á launamálum kjörinna fulltrúa í gegnum tíðina, og talað fyrir heildstæðri skoðun á launamálum hjá hinu opinbera, og á stórum vinnustöðum á borð við Reykjavík.

„Hvort það sé hægt að setja fram einhver viðmið um hvað teljist eðlilegur munur milli hæstu og lægstu launa. Það er eitthvað sem er ekki að fara að gerast núna á þeim fjórtán mánuðum sem eftir eru af kjörtímabilinu. Þetta er auðvitað bara verkefni Sósíalista og langtímaverkefni, en ég tel að það þurfi að fara fram umræða um slíkt,“ segir Sanna.

Hún segir það hafa verið sína upplifun, þegar hún tók sæti í borgarstjórn, að launin væru há. Því hafi hún ákveðið að gefa hundrað þúsund krónur af launum sínum í hverjum mánuði.

„Mér finnst eðlilegt að endurskoða það í ljósi launabreytinga sem eru að koma,“ sagði Sanna.

Heiða verði að meta framhaldið

Sanna var spurð hvort borgarstjórastarfið væri ekki full vinna, en svaraði því til að hún hefði aldrei verið borgarstjóri.

„Það verður bara að vera borgarstjóra að meta hvernig næstu skref verða.“

En ef hann sinnir [öðrum] störfum á þeim tíma sem hann á að vera í vinnu hjá borginni?

„Ég myndi halda, við erum í raun alltaf í vinnunni. Það er bara þannig, allavega svo ég tali fyrir mitt leyti. En svo veit ég ekki hvernig formaður Sambands íslenskra sveitarfélaga og borgarstjóri sér fyrir sér að halda áfram. Það verður bara að vera hennar að útskýra það og svara fyrir það. Ég hef ekki einu sinni setið í Sambandi íslenskra sveitarfélaga, þannig að ég veit ekki einu sinni hvernig vinnan fer þar fram.“

Vill ekki sjá Sjálfstæðismenn í meirihluta

Sanna var einnig spurð hvað hvort hún hefði skoðun á því hvort Heiða ætti að sinna öðrum störfum, samhliða setu á borgarstjórnarstóli. 

„Eins og ég segi, mér finnst ekki mitt að svara fyrir hvað hún gerir. Mér finnst það ekki,“ sagði Sanna. 

Hún sagði þó athyglisvert að skoða stjórn Sambands íslenskra sveitarfélaga og velta fyrir sér hvernig sú stjórn yrði samsett, færi svo að Heiða færi úr stjórn.

„Af því að þetta eru allt fulltrúar frá ólíkum flokkum. Persónulega myndi ég ekki vilja sjá meirihluta Sjálfstæðismanna þar, og velti fyrir mér hvort það sé inni í myndinni, ef það verða breytingar á stjórninni.“

Samkvæmt upplýsingum á vefsíðu sambandsins sitja tíu í stjórninni, þar af fimm á vegum Sjálfstæðisflokksins. Þó er eitt sæti autt, í Suðvesturkjördæmi. Það er vegna þess að Guðmundur Ari Sigurjónsson, áður bæjarfulltrúi Samfylkingarinnar á Seltjarnarnesi en nú alþingismaður, sagði sig úr stjórninni þegar hann náði kjöri á þing. 

Viðtalið við Sönnu má heyra í heild sinni í spilaranum hér að ofan.