Fyrir­liði City í á­falli eftir að stjórinn var rekinn

Taylor var rekinn frá City á mánudaginn, aðeins nokkrum dögum áður en liðið mætir Chelsea í úrslitaleik deildabikarsins. Nick Cushing stýrir City út tímabilið.

Greenwood var brugðið eftir brottrekstur Taylos en segist ekki þurfa frekari útskýringu á ákvörðun City.

„Nei, því ég er hér á hverjum degi og vinn með starfsfólkinu og leikmönnunum alla daga svo ég treysti ákvörðun félagsins. Ég vil ekki að neinn missi starfið sitt en þetta er ákvörðun sem var tekin og við verðum að treysta henni. Við verðum að horfa fram á veginn og við eigum bikarúrslitaleik á laugardaginn. Einbeitingin fer á hann,“ sagði Greenwood.

„Þetta var mikið að ná utan um, mikið að melta. Hlutverk mitt sem fyrirliði er að fá liðið saman og sjá til þess að einbeitingin sé sú sama, sem er á úrslitaleikinn á laugardaginn og leikina sem framundan eru. Ég var í áfalli eftir fréttirnar, að sjálfsögðu. Ég bjóst ekki við þessu en svona er bransinn og þetta er fótbolti.“

Taylor stýrði City í fimm ár og gerði liðið bæði að bikarmeisturum og deildabikarmeisturum.

Cushing þekkir vel til hjá City en hann var stjóri liðsins á árunum 2013-20. Undir hans stjórn varð City Englandsmeistari 2016 og vann einnig bikarkeppnina einu sinni og deildabikarinn í tvígang.

Greenwood, sem hefur leikið 96 leiki fyrir enska landsliðið, hefur verið í herbúðum City síðan 2020. Hún hefur ekkert spilað síðan hún meiddist á hné í desember á síðasta ári.