„Mæti honum með bros á vör“

Okeke lenti snemma í villuvandræðum en kom inn undir lokin og kláraði leikinn af krafti.

„Ég var mjög mótiveraður, reiður jafnvel, en þetta er körfubolti og maður verður að halda áfram. Sýna hvað í manni býr og ég gerði það… Ég var auðvitað ekki ánægður [með villurnar sem voru dæmdar á mig] en það er bara eins og það er. Ég var kannski aðeins of aggressívur, en aðalmálið er að við unnum leikinn.“

Baráttan milli miðherjanna, Okeke og Dominykas Milka hjá Njarðvík, var hörð undir körfunni í kvöld og mun án efa ráða miklu um úrslit einvígisins. Þeir þekkjast frá tímanum saman sem leikmenn Keflavíkur og takast alltaf vel á.

„Ekki spurning, þetta verður alltaf hörð barátta. Ég þekki hann vel eins og þú segir síðan í Keflavík og það er alltaf gaman að keppa við einn besta miðherja deildarinnar, sem hann er. Reynslumikill leikmaður og ég mæti honum með bros á vör.“

Undir lok leiks hneig Okeke til jarðar og hélt um hjartað, sem hefur áður verið til vandræða. Hræðsla fór um húsið en hann var fljótur aftur á fætur og lyfti þumli til að gefa í skyn að allt væri í góðu. Rétt áður en það gerðist hafði Okeke sett mikilvæg stig og áhorfendur stóðu á fætur til að syngja nafn hans.

„Ég er í góðu lagi og tilbúinn í næsta leik… Það er frábær tilfinning og ég vil þakka áhorfendum fyrir þeirra stuðning. Þau gefa mér hvatningu til að halda áfram sama hvað, hvort sem ég er í villuvandræðum eða öðrum vandræðum. Þetta er það besta við Álftanes, samfélagið í kringum liðið, þau hvöttu mig til að halda áfram og ég hugsaði bara: Allt í lagi, þið þurfið ekki að segja meira, kýlum á þetta“ sagði Okeke að lokum.