Bruno bestur í mars

Fernandes átti þátt í öllum fjórum mörkunum sem United skoraði í mars. Hann skoraði beint úr aukaspyrnu í 1-1 jafntefli við Arsenal og skoraði svo eitt mark og lagði upp tvö í 0-3 sigri á Leicester City.

Fernandes gekk í raðir United frá Sporting í janúar 2020 og var fjórum sinnum valinn leikmaður mánaðarins á fyrsta árinu sínu með Rauðu djöflunum. Fimmta viðurkenningin bættist svo við í dag.

Aðeins fimm leikmenn hafa oftar verið valdir leikmaður mánaðarins í ensku úrvalsdeildinni en Fernandes. Harry Kane, Sergio Agüero og Mohamed Salah hafa fengið þessa viðurkenningu sjö sinnum hver og Steven Gerrard og Cristiano Ronaldo sex sinnum hvor.

Þrátt fyrir að illa hafi gengið hjá United á tímabilinu hefur Fernandes staðið fyrir sínu. Hann hefur skorað átta mörk og gefið níu stoðsendingar í 29 deildarleikjum.

United, sem er í 13. sæti ensku úrvalsdeildarinnar fær Manchester City í heimsókn á sunnudaginn.