Leeds vann B-deildina en Plymouth og Luton féllu

Guðlaugur Victor Pálsson lék allan leikinn fyrir Plymouth Argyle sem tapaði fyrir Leeds United, 1-2. Hlutskipti liðanna var ólíkt. Leeds vann deildina en Plymouth féll. Manor Salomon skoraði sigurmark Leeds í uppbótartíma.

Leeds fékk hundrað stig, líkt og Burnley sem vann Millwall, 3-1. Markatala Leeds var hins vegar hagstæðari (+65 mörk gegn +53 mörkum).

Coventry City, sem Frank Lampard stýrir, tryggði sér 5. sætið með sigri á Middlesbrough, 2-0. Í umspilinu mætir Coventry Sunderland og Sheffield United og Bristol City eigast við.

Luton tapaði fyrir West Brom, 5-3, og þar með var ljóst að liðið félli annað árið í röð. Í fyrra féll Luton úr ensku úrvalsdeildinni og liðið er núna komið niður í C-deildina.

Stefán Teitur Þórðarson kom inn á sem varamaður á 72. mínútu þegar Preston gerði 2-2 jafntefli við Bristol City á útivelli. Preston endaði í 20. sæti.

Úrslitin í lokaumferðinni