Logi og Hall­veig keyptu hús í 101

Um er að ræða 146,5 fermetra hús á þremur hæðum sem upphaflega var byggt árið 1934. Húsið er bárujárnsklætt timburhús á steyptum kjallara og hefur verið endurnýjað með mikilli natni á undanförnum árum.

Gengið er inn á miðhæð hússins þar sem eldhús og stofa renna saman í eitt. Í eldhúsinu er snyrtileg hvít innrétting með svörtum granítsteini á borðum. Þaðan er útgengt um tvöfalda glerhurð á nýlegar svalir sem leiða niður í garð.

Sjarmerandi viðarstigi leiðir upp á efri hæð hússins, sem skiptist í tvö rúmgóð svefnherbergi, fataherbergi og baðherbergi með baðkari og sturtu. Á gólfum eru upprunalegar viðarfjalir. Í kjallara er hlýlegt fjölskyldurými, geymsla, snyrting, þvottahús og tvö svefnherbergi.

Garðurinn er sérlega glæsilegur eftir endurgerð lóðarinnar árið 2021, sem var unnin af landslagsarkitektinum Svövu Þorleifsdóttur. Þar er vandað útisvæði með sólpöllum, hellulögðum stígum, skjólveggjum og garðskála með kamínu. Háir timburveggir veita gott skjól fyrir vindi og umferðarnið.