Svan­hildur Hólm fór holu í höggi

Logi Bergmann Eiðsson, eiginmaður Svanhildar, hefur fjallað mikið og ítarlega um þrá sína eftir því að fara holu í höggi. Og hefur þetta verið stöðugt til umfjöllunar í hlaðvarpi þeirra Jóns Júlíusar Karlssonar; allir gestir eru spurðir í þaula um þetta atriði.

Boltinn beint ofan í af 135 metra færi

Svanhildur segir hins vegar frá því að þau hjónin hafi farið í golf með vinum þeirra, þeim Gunnari Úlfarssyni og Jóni Júlíusi.

„Jón Júlíus og Logi höfðu ákveðið að taka upp á nokkrum holum, enda eru þeir saman með hið stórgóða hlaðvarp Seinni níu. Þeir voru reyndar ekki með upptöku í gangi þegar ég sló teighöggið á 2. holu vallarins, en tóku fljótt við sér og skjalfestu það sem á eftir kom! Ég setti sem sagt boltann ofan í, á 135 metra færi, með sjö-járni.“

Svanhildur birtir myndbönd með frásögninni sem sjá má hér neðar og segist ekkert hafa skilið í þessu en þetta hafi verið gaman og frábært að þetta skyldi gerast með góðum vinum sem fögnuðu stórkostlega með mér.

„Það má líka fylgja sögunni að við Logi erum enn gift og ætlum að vera það áfram, þrátt fyrir allar yfirlýsingar hans um að ef ég færi holu í höggi á undan honum væri það fullkominn forsendubrestur í þessu hjónabandi!“

Besti hringur Loga sem reyndist huggun harmi gegn

Svanhildur fékk svo afhentan sérstakan fána Bretton Woods-klúbbsins nálægt Washington, hvar þau voru að spila og fæ nafnið sitt upp á vegg í klúbbhúsinu. Hún heldur að hún sé annar Íslendingurinn til þess. Hinn er Bragi Valgeirsson.

„En af því að alheimurinn leitar alltaf jafnvægis og gætir þess að maður ofmetnist ekki, er rétt að geta þess að ég labbaði á kyrrstæðan golfbíl á sautjándu braut. Gunnar var eftir hringinn ekki viss um hvort væri merkilegra, að fara holu í höggi eða labba á golfbíl,“ segir Svanhildur á Facebook-síðu sinni.

„Já, enn sem komið er þá heldur hjónabandið. Hann var búinn að nefna þetta í þættinum að það myndi koma til skilnaðar,“ segir Jón Júlíus. En það hafi nú mjög líklega verið í nösunum á honum. Þetta hafi verið frábært högg hjá Svanhildi og stefndi allan tímann á pinnann.

„En þetta er líklega besti hringurinn sem Logi hefur spilað í Bandaríkjunum þannig að það var huggun harmi gegn. Hann var að spila mjög gott golf. Hann hefur verið í púttveseni en það var ekki núna, hann púttaði eins og engill. Ég hef áður verið viðstaddur þegar einhver hefur farið holu í höggi. Það trúði þessu enginn. Þetta var stórkostlegt," segir Jón Júlíus kátur.