„Easy come, easy go“

Borgarstjórnarflokkur Framsóknar myndi þurrkast út ef gengið yrði til kosninga í dag samkvæmt nýrri könnun Gallup þar sem hann mældist aðeins með þriggja prósenta fylgi.

Einar Þorsteinsson, oddviti flokksins í borginni, segist ósáttur við niðurstöðuna og telur uppi skýrt ákall um nýjan meirihluta til hægri.

Stemningin fyrir Framsókn horfin

Ólafur Harðarson segir að hafa verði í huga að Framsóknarflokkurinn hafi unnið mjög mikinn kosningasigur síðast, hann hafi fengið fjóra borgarfulltrúa.

„Ef við lítum til síðustu ára eða áratuga, þá hefur Framsóknarflokkurinn venjulega í borginni verið með einn eða engan.“

„Síðan hefur flokkurinn líka, hann vann mjög góðan sigur í þingkosningunum 2021, og hrundi síðan í síðustu kosningum, er núna að mælast milli fimm og sex prósent á þingi, þannig að þrjú prósent í borginni koma þannig séð ekki á óvart í þessum skilningi,“ segir Ólafur.

Það var mikil stemning fyrir flokknum, núna er þessi stemning horfin, það hlýtur að vera ástæða fyrir þessu?

„Hún er bara horfin, bæði í borginni og í landinu. Í rauninni fékk flokkurinn í síðustu kosningum í borginni miklu meira heldur en nokkur hafði búist við.“

„Og það er nú eins og oft gerist í lífinu, easy come, easy go. Þannig að þetta var lausafylgi, það var ekki fast í hendi.“

Margt geti breyst fram að kosningum

Ólafur segir að sjálfsagt hafi margir orðið fyrir vonbrigðum með flokkinn. Hins vegar hafi Einar slitið meirihlutasamstarfinu og farið í minnihluta.

„En eftir það hefur fylgið ekkert hreyfst.“

Þá þurfi að hafa í huga að skoðanakannanir á miðju kjörtímabili hafi mjög lítið forspárgildi um útkomuna í næstu kosningum. Framsóknarmenn í borginni þurfi því ekki að örvænta enn sem komið er, en staðan sé óneitanlega erfið fyrir flokkinn.

„Hins vegar er í rauninni það sem er merkilegast við þessa könnun er kannski tvennt, í fyrra lagi það, að meirihlutinn, sem Einar kallar hinn róttæki vinstri meirihluti, hann heldur meirihlutanum í þessari könnun.“

„Hitt sem er líka athyglisvert með þetta eins og í síðustu könnunum, kemur Sjálfstæðisflokkurinn tiltölulega vel út, hann er að mælast yfir 30 prósent sem er mun meira heldur en hann hafði verið að fá í kosningum, og líka samanborið við þingkosningarnar síðustu.“

„Þannig að allir geta fundið eitthvaðtil að gleðjast yfir, nema kannski Framsóknarflokkurinn.“

Ólafur segir of snemmt að segja til um það hvort blokkir séu að myndast fyrir næstu borgarstjórnarkosningar.

„Einar Þorsteinsson segir að hann vilji frekar vinna til hægri eða með Sjálfstæðisflokknum. Hins vegar getur það breyst, það sem skiptir auðvitað mestu máli er bara hvað nákvæmlega kemur upp úr kössunum.“

„Og eins og Einar sgaði sjálfur þegar hann myndaði meirihluta með Degi, til þess að mynda meirihluta í Reykjavík verður maður að kunna telja upp á tólf, það er aðalatriðið,“ segir Ólafur Þ. Harðarson.

Segir engum hollt að stjórna svo lengi

Einar Þorsteinsson ræddi við umsjónarmenn Reykjavík síðdegis á Bylgjunni í gær þar sem hann ræddi stöðuna í borginni og sömuleiðis stöðu Framsóknar í könnunum. 

Hann sagði þar meðal annars það væri að löngu að gefa Samfylkingunni frí frá stjórn borgarinnar. Hann sagði að það væri engum hollt að stjórna svona lengi.

Hlusta má á viðtalið í heild sinn í spilaranum að neðan.