Loft­gæði mælast ó­holl á Akur­eyri

Á vefnum Loftgæði.is í eigu Umhverfisstofnunar má sjá að hár styrkur örfíns svifryks, PM1, gerir það að verkum að loftgæði mælast óholl. Þegar loftgæði mælast óholl vegna gasmengunar af völdum eldgoss er það aftur á móti styrkur brennisteinsdíoxíðs, SO2, sem mælist hár. 

Steinunn Helgadóttir náttúruvársérfræðingur á Veðurstofu Íslands staðfestir í samtali við fréttastofu að loftmengunin sé af völdum svifryks. Líklega hafi svifrykið færst frá Evrópu eða hálendinu.

Gasmengunar frá eldgosinu við Sundhnúksgíga hefur orðið viðvart á Snæfellsnesi og á Vestfjörðum. Búist er við gasmengun aftur í dag á vestanverðu Snæfellsnesi. 

Á vef Umhverfisstofnunar er mælst til þess að einstaklingar með alvarlega hjarta- eða lungnasjúkdóma forðist að vera úti þegar loftgæði mælast óholl. Forðast ætti að vinna erfiðisvinnu eða að stunda líkamsrækt utandyra þar sem loftmengun er mikil.