Svona er hópur Íslands sem fer á EM

Valur Páll Eiríksson skrifar 19. ágúst 2025 13:01

Martin Hermannsson er meðal þeirra tólf sem fara á EM í næstu viku. vísir / anton brink

Craig Pedersen, landsliðsþjálfari karla í körfubolta, hefur opinberað hvaða tólf leikmenn fara fyrir Íslands hönd á Evrópumótið sem hefst í næstu viku. Almar Orri Atlason dettur út úr hópnum, sem hafði fyrir daginn í dag verið skorinn niður í 13 leikmenn.

Jaka Brodnik féll úr lestinni í síðustu viku úr 14 manna hópi Íslands. Ljóst var að aðeins tólf færu á mótið og beðið eftir lokahópi sem hefur nú verið tilkynntur. Almar Orri Atlason, yngsti leikmaðurinn í hópi Íslands, fer ekki með.

Stjarnan á flesta leikmenn í hópi Íslands; þá Hilmar Smára Henningsson, Orra Gunnarsson og Ægi Þór Steinarsson. Tveir leikmenn sem spiluðu með Val í fyrra eru í hópi Íslands; Kári Jónsson og Kristinn Pálsson en sá síðarnefndi heldur til Ítalíu til að leika með liði Jesi eftir mót.

Sigtryggur Arnar Björnsson, leikmaður Tindastóls, er einnig í hópnum en hann átti stórleik í æfingaleik við Pólverja í aðdraganda mótsins.

Fimm atvinnumenn eru í hópi Íslands. Elvar Már Friðriksson, sem lék í Grikklandi í fyrra en heldur til Póllands eftir mót, Jón Axel Guðmundsson, leikmaður Burgos á Spáni, Martin Hermannsson sem leikur með Alba Berlín í Þýskalandi, Styrmir Snær Þrastarson, sem lék í Belgíu í fyrra en er á leið til Spánar, og Tryggvi Snær Hlinason, leikmaður Bilbao á Spáni.

Ísland hefur leik á EM gegn Ísrael á fimmtudag í næstu viku, 28. ágúst, í Katowice í Póllandi þar sem riðill Íslands verður leikinn.

Liðið flýgur út til Litáen á fimmtudag og mætir þar heimamönnum í Vilnius á föstudag í síðasta æfingaleik fyrir mót.

Leikmannahóp og starfslið KKÍ má sjá að neðan.