Slóvenar sluppu með skrekkinn gegn Í­tölum

Slóvenar byrjuðu leikinn af miklum krafti og leiddu með tæpum 20 stigum, 11-29, eftir fyrsta leikhluta. Þeir virtust vera með leikinn nokkurn veginn í hendi sér í upphafi fjórða leikhluta en þá kom afar slæmur kafli þar sem Slóvenar skoruðu ekki körfu í rúmar fimm mínútur og Ítalir minnkuðu muninn í eitt stig, 77-78. Hinn 37 ára Danilo Gallinari fór mikinn á þessum kafla.

Þá rönkuðu Slóvenarnir loksins við sér og náðu að snúa leiknum sér í hag og skoruðu síðustu sex síðustu stigin í leiknum. Luka Doncic setti fjögur þeirra, öll af vítalínunni.

Doncic var eins og svo oft langstigahæstur í liði Slóvena og skoraði 42 stig og bætti við tíu fráköstum. Hann gaf aftur á móti aðeins eina stoðsendingu.

Hjá Ítölum var Simone Fontecchio, leikmaður Miami Heat, stigahæstur með 22 stig.