Besta sætið: „Alltaf ein­hver sem skítur á sig í svona leik“

Elliði klikkaði á öllum þremur skotunum sínum í leiknum í Kristianstad í gær og fann sig ekki. Þrátt fyrir það er Rúnar í rónni hvað línumanninn varðar.

„Hann er samt peyi, Eyjamaður. Því meira vesen sem verður því betri verður hann,“ sagði Rúnar í Besta sætinu, hlaðvarpi íþróttadeildar Sýnar. Einar Jónsson sagði að Rúnar tæki hanskann alltaf upp fyrir Eyjamenn eftir tíma hans hjá ÍBV. 

„Þú bakkar Eyjamenn endalaust upp,“ sagði Einar, þjálfari Íslands- og bikarmeistara Fram, í léttum dúr. 

„Ég er bara með glasið hálf fullt. Það er alltaf einhver sem skítur á sig í svona leik. Ég var svolítið þessi gaur alltaf,“ svaraði Rúnar og Einar benti í kjölfarið á að Rúnar væri sjálfur aldrei góður á móti slakari liðum. Skyttan öfluga fór þá aðeins aftur í tímann og rifjaði upp leik frá landsliðsferlinum.

„Ég held að Guðmundur Guðmundsson hafi einhvern tímann sprengt slagæð í leik þar sem við vorum að vinna Eistland með nítján mörkum. Ég kom inn á og hann fékk held ég hjartaáfall,“ sagði Rúnar. 

Næsti leikur Íslands er gegn Póllandi klukkan 17:00 á morgun. Íslendingar ljúka svo leik í riðlakeppninni gegn Ungverjum á þriðjudagskvöldið.

Hlusta má á Besta sætið í spilaranum hér fyrir ofan eða hér fyrir neðan. Þáttinn má einnig nálgast á öllum helstu hlaðvarpsveitum.