Heitavatnslög gaf sig í Varma­hlíðar­skóla

„Það er búið að stöðva lekann en þetta gerðist um nótt þannig það lak alla nóttina,“ segir Kristvina Gísladóttir, aðstoðarskólastjóri við skólann.

„Þetta gerðist uppi á lofti, þetta var einhver lögn sem lá inni á loftræstikerfi. Öll steinullin sem var uppi á loftinu er blaut.“

Hún lýsir því hvernig bleytan hafi blasið við starfsmönnum sem mættu snemma til vinnu á þriðjudagsmorgun. Kristvina hælir starfsfólkinu sem hafi brugðist hratt við. 

„Það er ótrúlegt í hvaða gír fólk fer, allir hjálpast að og hlaupa á milli,“ segir hún.

Kristvina segir starfsmenn tryggingafélags og sveitarfélagsins á vettvangi og að unnið sé að því að þurrka húsið. Í gær hafi starfsfólkið hliðrað starfseminni svo, ef húsið er talið nægilega þurrt að loknu vetrarfríi á þriðjudag, sé hægt að taka á móti nemendunum sem eru 110 talsins.

Vetrarfrí barnanna er til og með mánudegi svo eftir helgi verður staðan metin. Vinnurými starfsfólksins, þar á meðal skrifstofa skólastjóra og ritara, komu hvað verst út úr lekanum. Tónlistarskólinn sem er til húsa í grunnskólanum slapp með skrekkinn svo telur Kristvina möguleika á að flytja starfsemi skólans tímabundið yfir.

Óhefðbundinn öskudagsfögnuður

Öll kennsla féll niður bæði þriðjudag og miðvikudag, þar á meðal sérstakur öskudagsfögnuður. Sjö skólabílar sækja nemendur skólans í nágrenni hans og voru fyrstu nemendurnir að stíga um borð þegar foreldrarnir voru látnir vita af lekanum.

„Því við erum í sveitinni höfum við haft skemmtun fyrir krakkana fyrir hádegi og svo hafa allir farið í vetrarfrí,“ segir Kristvina en öskudagsnefndin hafði haft fyrir því að tryggja að fyrirtæki á svæðinu væru opin og tilbúin að taka við börnunum.

Einhver þeirra hafi farið á eigin vegum þangað, eða á Sauðárkrók, en önnur fagnað lengra vetrarfríi.