Kúltúrhjón selja sjarmerandi eign í 101

Helga Jóakimsdóttir er fædd árið 1988 og hefur vakið athygli fyrir vinsælar sýningar í Ásmundarsal. Hún og Erlendur Sveinsson giftu sig árið 2015 og bjuggu lengi í New York þar sem Erlendur stundaði nám við leikstjórn í hinum virta Columbia háskóla. 

Erlendur er verðlaunaður leikstjóri og hefur komið að ýmsum stuttmyndum og tónlistarmyndböndum. 

Hjónin hafa sett eign sína að Smáragötu 5 á sölu og er ásett verð 82,9 milljónir. Íbúðin er 74,1 fermetrar og skiptist í forstofu, eldhús, baðherbergi, svefnherbergi og tvær samliggjandi stofur en önnur þeirra er nýtt sem svefnherbergi. 

Í íbúðinni er nýlega lagt límt eikarparket ásamt endurnýjaðri eldhúsinnréttingu, gluggum og baðherbergi. 

Einnig voru ofnar hreinsaðir og sandblásnir ásamt þess að hljóðdúkur frá Enso var settur í loft, sem tryggir hágæða hljóðvist.

Smáragata er í Þingholtunum rétt við Hljómskálagarðinn og nálægt öllum helstu miðbæjarperlunum. 

Hér má nálgast nánari upplýsingar um íbúðina.