Út­lit fyrir vor­veður á næstu dögum

Þetta er meðal þess sem kemur fram á vef Veðurstofu Íslands. Í hugleiðingum veðurfræðings segir að í kvöld verði allhvasst við Öræfi en hægari vindur norðaustanlands.

Þar er einnig biðlað til þeirra ökumanna sem verða á ferðinni í kvöld um að fylgjast vel með staðarspám en á svæðinu geta skapast varasamar aðstæður fyrir ökutæki sem taka á sig mikinn vind, svo sem húsbíla og vörubíla.

Búast má við dálitlu éli og slyddu norðan- og austantil, en snjókomu, slyddu eða rigningu síðdegis. Á morgun tekur svo að lægja um landið sunnan- og austanvert með rigningu eða slyddu. Hiti frá frostmarki og allt að níu stigum.

Útlit er svo fyrir hlýrra og rólegra vorveður í flestum landshlutum fram í miðja næstu viku.

Í tilkynningu segir að vegna snjókomu verði blint á fjallvegum austantil á landinu eftir klukkan fjögur í dag t.d. Fagradal og Fjarðarheiði, og svo á einnig á flestum heiðum um norðanvert landið í nótt. 

Hægari vindur og dregur úr ofankomu í fyrramálið, en áfram hríð á fjallvegum á Vestfjörðum á morgun, t.d. Klettsháls og Steingrímsfjarðarheiði, fram á aðra nótt.

Hægt er að fylgjast með færð á vegum á vef Vegagerðarinnar.

Veðurhorfur á landinu næstu daga

Á sunnudag: Norðan og norðaustan 13-20 m/s með snjókomu eða slyddu og rigningu, en lægir smám saman sunnan- og austanlands. Dregur úr úrkomu norðanlands síðdegis. Hiti 1 til 7 stig.

Á mánudag: Norðaustan 10-18 og snjókoma eða slydda norðvestantil, annars hægari og víða rigning, skúrir eða slydda með ströndinni, en bjart með köflum suðvestanlands. Hiti breytist lítið.

Á þriðjudag: Suðaustlæg eða breytileg átt 3-10 og þurrt að mestu, en rigning eða slydda suðaustan og austantil. Bætir í vind og úrkomu sunnan- og austantil með kvöldinu. Hiti um og undir frostmarki fyrir norðan, en 2 til 8 stig syðra.

Á miðvikudag: Strekkings eða allhvöss norðaustan- og austanátt með rigningu eða slyddu, einkum austanlands, en lengst af úrkomulítið norðvestanlands. Heldur hlýnandi.

Á fimmtudag: Útlit fyrir ákveðna suðaustlæga átt og rigningu, einkum suðvestantil, en bjart með köflum norðanlands. Lægir með deginum og dregur úr úrkomu. Kólnandi.

Fréttin var uppfærð klukkan 9:36 vegna tilkynningar varðandi erfið akstursskilyrði.