Vinstrið eygir þrjá borgarfulltrúa og sjálfstæðismenn þann sjöunda

Kjartan Kjartansson skrifar 20. apríl 2026 09:34

Stefán Pálsson, sagnfræðingur, gæti orðið þriðji borgarfulltrúi Vinstrisins. Það er sameiginlegt framboð Vinstri grænna og Vors til vinstri undir forystu Sönnu Magdalenu Mörtudóttur, fyrrverandi sósíalista. Vísir/Vilhelm

Líkur Vinstrisins á að ná þremur mönnum inn í borgarstjórn í Reykjavík fara vaxandi í nýuppfærðri kosningaspá Vísis. Sjálfstæðisflokkurinn og Samfylkingin eru enn jöfn en sjálfstæðismenn eygja nú möguleikann á að ná sjöunda manninum inn, einum fleiri en keppinauturinn.

Stóra myndin í kosningaspá Baldurs Héðinssonar, stærðfræðings, hefur lítið breyst eftir að hún var uppfærð með niðurstöðum úr könnun Gallup sem var birt fyrir helgi.

Lítill munur er þannig áfram á fylgi stóru flokkanna tveggja sem stefna í að fá sex menn kjörna hvor. Meirihlutamynstur eftir kosningar gæti ráðist af því hvernig atkvæði dreifast á milli Vinstrisins, Viðreisnar og Miðflokksins sem fengju að minnsta kosti tvo borgarfulltrúa hvert framboð og keppast um að ná inn þeim þriðja.

Stefán Pálsson, þriðji maður á lista Vinstrisins, hefur nú 79 prósent líkur á að ná kjöri samkvæmt kosningaspánni en hann hafði um helmingslíkur áður en spáin var uppfærð.

Á móti hafa líkur Þorvaldar Davíðs Kristjánssonar, þriðja manns á lista Viðreisnar, dregist saman úr 72 prósentum í 56 prósent eftir að könnun Gallup var birt. Lárus Blöndal, þriðji maður á lista Miðflokksins fer úr 52 prósent líkum í 48 prósent.

Sjálfstæðisflokkur fram úr Samfylkingu

Fylgi Sjálfstæðisflokksins í kosningaspánni jókst um tvö prósentustig eftir að hún var uppfærð og Samfylkingarinnar dalaði um tæpt prósentustig. Sjálfstæðisflokkurinn er nú stærstur í kosningaspánni.

Þetta hefur þau áhrif að Albert Guðmundsson, sjöundi maður á lista sjálfstæðismanna, hefur nú 49 prósent líkur á að komast inn en þær voru rétt innan við þrjátíu prósent áður en spáin var uppfærð.

Albert Guðmundsson er fyrrverandi formaður Heimdallar og formaður Varðar. Hann gæti komist inn í borgarstjórn sem sjöundi maður Sjálfstæðisflokksins.Sjálfstæðisflokkurinn

Regína Ásvaldsdóttir, sjöunda á lista Samfylkingarinnar, hefur nú fjórðungslíkur á að komast inn en hafði rétt rúmlega þriðjungslíkur á dögunum.

Tvísýnt um framtíð þriggja flokka

Einar Þorsteinsson, fyrrverandi borgarstjóri og oddviti Framsóknarflokksins, berst fyrir tilvist flokksins í borgarstjórn. Hann hafði 76 prósent líkur á að komast að áður en spáin var uppfærð en þær standa nú í 67 prósentum.

Borgarstjórn Reykjavíkur

kosningaspá

Píratar eru í sömu stöðu. Kristinn Jón Ólafsson, oddviti þeirra, er nú með 65 prósent líkur á að ná inn en hafði 76 prósent líkur fyrir uppfærslu.

Líkur Guðmundar Inga Þóroddssonar, oddvita Flokks fólksins, eru lítið breyttar og standa nú í 57 prósentum.

Fjórðungslíkur eru á að Silja Sóley Birgisdóttir, oddviti Sósíalistaflokksins, nái inn í borgarstjórn. Líkur Sigfúsar Aðalsteinssonar, oddvita Okkar borgar, eru vart mælanlegar.

Um kosningaspána:

Kosningaspá Baldurs Héðinssonar byggir á niðurstöðum skoðanakannana. Þeim er gefið vægi út frá þremur þáttum; hversu margir svara könnun, hversu langt er frá því könnunin var gerð og hver stendur að henni. Útkoman er spá um hlutfall atkvæða sem hver flokkur hlýtur.

Í framhaldinu hermir kosningaspáin 100.000 sýndarkosningar þar sem flökt er á fylgi. Fyrir hverja niðurstöðu er borgarstjórnarsætum úthlutað. Þær hermanir gefa svo mat á líkum hvers frambjóðanda að ná kjöri.

Könnun Gallup sem var gerð fyrri helming aprílmánaðar hefur 59 prósent vægi í nýjustu útgáfu spárinnar en könnun Maskína frá miðjum mars 41 prósent vægi.

Sveitarstjórnarkosningar 2026 Sveitarstjórnarmál Reykjavík Skoðanakannanir Kosningaspá Vísis Vinstrið Sjálfstæðisflokkurinn

Mest lesið

Fleiri fréttir