Rifjaði upp mar­tröðina á Arnarhóli

Auðunn spurði Friðrik í þættinum hvort hann myndi eftir verstu tónleikunum og þá stóð ekki á svörum. Eftirminnilegir tónleikar á Arnarhóli á Menningarnótt stóðu þar upp úr. Friðrik var þá að koma fram í fyrsta sinn með svokallað innra eyra og réði illa við það, auk þess sem eyrað var bilað og heyrðust miklir skruðningar á meðan hann flutti sína tónlist. Úr varð líklega hans versti flutningur eins og hann getur hlegið að í dag.

„Ég var að fara að nota innra eyra á tónleikunum mínum í Hörpu stuttu seinna og ég var bara svo samviskusamur með það að ég væri bara að æfa mig í að nota innra eyra,“ segir Friðrik og heldur áfram.

„Þetta skrifast bara á reynsluleysi að kippa þessu ekki úr. Ég var bara með einhverja skruðninga og kjaftæði í eyranu. Pabbi var búinn að koma sér fyrir fyrir framan mitt sviðið og þegar ég náði augnsambandi við hann sá ég hann gefa mér merki um að drulla þessu úr eyranu.“

Í þættinum fer Friðrik meðal annars á dýptina og talar um það hversu stoltur hann sé af sjálfum sér, fyrir að standa með sjálfum sér í gegnum allan ferilinn og koma sér og fjölskyldu sinni fyrir, með því að vera tónlistarmaður. Á einum tímapunkti má sjá Friðrik brotna hálfpartinn niður þegar hann rifjar upp þess vegferð sína. Hægt er að sjá þáttinn í heild sinni á Sýn+.