Albert keypti þak­í­búð á hálfan milljarð

Viðskiptablaðið greindi fyrst frá kaupunum í gær. Albert keypti íbúðina í gegnum félag sitt, Albert ehf., af byggingarfélaginu Iðu ehf. sem Björt Ólafsdóttir stýrir og byggði húsið.

Frakkastígur 1 er sjö hæða fjölbýlishús sem er nýrisið í Skuggahverfinu niðri við Sæbraut. Búið er að selja sex íbúðir af þeim níu sem auglýstar eru á söluvef Iðu, þar á meðal keypti Sigurður Gísli Pálmason íbúð á fimmtu hæð á 375 milljónir.

Íbúðin sem Albert keypti er 327 fermetrar að stærð og er á tveimur efstu hæðunum, sem gerir hana að þakíbúð. Tvær þaksvalir fylgja íbúðinni og á efri hæðinni er tengi fyrir heitan pott.

Íbúðin er nýjasta viðbótin í býsna stórt fasteignaveldi Alberts Guðmundssonar, sem er búsettur í Flórens og spilar þar fyrir Fiorentina. Vísir greindi í fyrra frá ört stækkandi veldi Alberts sem hefur keypt fjölda nýrra íbúða niður í bæ, einbýlishús á Seltjarnarnesi og íbúð í Róm.