Svona gekk að flytja vindmyllurnar

Í fréttum Sýnar mátti sjá þegar lest fimm flutningabíla lagði af stað úr Þorlákshöfn laust fyrir miðnætti en lögreglan á Suðurlandi stýrði þessum vandasömu flutningum. Lestin ók löturhægt yfir Óseyrarnesbrú yfir ósa Ölfusár og bara einn trukkur í einu en meðalhraðinn á þessari 130 kílómetra leið var um 25 kílómetrar á klukkustund.

Hringtorgið austan við Selfoss var þó fyrsta stóra áskorunin enda vindmyllublöðin nærri sjötíu metra löng. Það reyndist þó auðvelt að fara þar í gegn en öll önnur umferð um torgið var stöðvuð á meðan.

Tímasetning flutninganna um hánótt, að hluta um þjóðveg eitt, var einmitt valin með það í huga að þá væri þjóðvegaumferð í lágmarki enda ekki mikið pláss eftir á veginum til að mæta svona trukkum, hvað þá að aka framúr þeim. Meðal annars var farið yfir Þjórsárbrú, einnig löturhægt.

Þegar lestin var komin upp úr Landssveit, með Heklu í baksýn, var farið að birta af degi. Ofan Búrfells var ekið framhjá virkjunarmannvirkjum við Ísakot og vindmyllunum tveimur í Búrfellslundi en svo tók við þjóðvegarykið.

Það var svo um hálffimmleytið í morgun sem áfangastað var náð við Vaðöldu, neðan Sultartangastíflu, en þá var sólin að koma upp.

Næsti flutningur verður svo í nótt. Farnar verða alls 42 ferðir á næstu sjö til átta vikum til að flytja fjórtán vindmyllur.