Van Dijk sendi Slot kveðju

Hollendingarnir Van Dijk og Slot fögnuðu saman Englandsmeistaratitli fyrir ári síðan, á fyrstu leiktíð Liverpool undir stjórn Slot, en í vetur gekk allt á afturfótunum og hafnaði Liverpool í 5. sæti ensku úrvalsdeildarinnar, án titils, og komst með naumindum inn í Meistaradeild Evrópu á næstu leiktíð.

Í aðdraganda brottrekstursins sendi Mohamed Salah Slot tóninn, óbeint, með skrifum um að Liverpool yrði að endurheimta þungarokksfótboltann sem kom liðinu í hæstu hæðir og að allir sem kæmu til félagsins yrðu að skilja það.

Van Dijk birti hins vegar mynd af sér smeð Slot og skrifaði falleg orð til landa síns nú þegar ljóst er að þeirra leiðir skilja.

„Við gleymum aldrei Englandsmeistaratitlinum sem við unnum á fyrsta tímabilinu okkar saman. Þakka þér, Þjálfi, og megi þér og fjölskyldu þinni vegna sem allra best í framtíðinni,“ skrifaði Van Dijk.

Flest bendir til þess að næsti knattspyrnustjóri Liverpool verði Andoni Iraola sem náð hefur frábærum árangri með lið Bournemouth og komið því í Evrópukeppni í fyrsta sinn.

Florian Plettenberg, blaðamaður Sky Sport í Þýskalandi, segir þó að Iraola hafi enn ekki alveg hafnað Bayer Leverkusen en að viðræður hans við Liverpool séu í gangi og þróist í rétta átt.