Innlent

Ari missti af fyrsta fundinum

Agnar Már Másson skrifar
„Það hefur ekki legið á minni ákvörðun,“ segir Ari Edwald. Á mynd situr hann á nýliðanámskeiði sem haldið var í ráðhúsinu í síðustu viku.
„Það hefur ekki legið á minni ákvörðun,“ segir Ari Edwald. Á mynd situr hann á nýliðanámskeiði sem haldið var í ráðhúsinu í síðustu viku. Vísir/Sigurjón

Ari Edwald, oddviti Miðflokksins í Reykjavík, var fjarverandi á fyrsta fundi nýrrar borgarstjórnar í dag þar sem hann var erlendis. Hann segist eiga eftir að ákveða hvort hann þiggi boð nýs borgarstjórnarmeirihluta um að gerast stjórnarformaður í Orkuveitu Reykjavíkur, en hann væntir þess að taka þá ákvörðun í næstu viku, þegar búið verður að tilnefna í stjórn.

Ný borgarstjórn kom saman á sínum fyrsta formlega fundi og voru þar allir oddvitar nema Ari Edwald.

Í svari til Vísis skrifar Ari að það hafi hist þannig á að hann sé erlendis í nokkra daga og því hafi varamaður hans setið fundinn í hans stað, sem er Hlédís Maren Guðmundsdóttir.

Eins og fram kom við myndun nýs meirihluta Framsóknar, Viðreisnar og Sjálfstæðisflokks hefur Ara verið boðið að gerast stjórnarformaður í Orkuveitu Reykjavíkur.

Í svari sínu segir Ari að borgarráð, sem kosið var í dag með Einar Þorsteinsson í fararbroddi, muni skipa tilnefningarnefnd sem geri svo tillögu um skipan stjórnar Orkuveitunnar.

„[S]vo það hefur ekki legið á minni ákvörðun,“ skrifar hann. „Hún mun væntanlega liggja fyrir í næstu viku.“

Ari var ekki einn um það að vera fjarverandi en Guðný María Jóhannsdóttir, borgarfulltrúi Sjálfstæðisflokksins, var ekki heldur viðstödd.

Miðflokkurinn Borgarstjórn Sveitarstjórnarkosningar 2026 Orkumál

Mest lesið


Fleiri fréttir

Sjá meira


×

Mest lesið