Sótti silfur á EM eftir rúmt ár af meiðslum

Kristófer sleit krossband síðasta vor og fór í aðgerð í maí í fyrra. Hann hafði verið frá í meira en 13 mánuði þegar hann komst loks aftur út á völl, rétt í tíma fyrir EM U20 ára og komst hann því út á mótið með félögum sínum.

„Þetta var svakalegt áfall, að vera frá körfubolta í heilt ár eftir að hafa spilað alla daga bara frá því að ég var sex ára. Að koma aftur til baka og vera góður með landsliðinu eftir heilt ár, var svakalegt... 

Þetta var ógeðslega erfitt, að geta ekki hreyft sig almennilega eða spilað körfubolta eins og ég hafði gert allt mitt líf. Fólkið í kringum mig hjálpaði mér í gegnum þetta allt. Þau stóðu með mér í gegnum allt, sáu það erfiðasta og hjálpuðu mér mjög mikið,“ sagði Kristófer í viðtali við Val Pál Eiríksson fyrir Sportpakka Sýnar. 

Árangurinn á mótinu var vonum framar. Ísland hafnaði í öðru sæti í B-deild mótsins og komst þar með upp í A-deild. Kristófer var á meðal betri leikmanna Ísland á mótinu.

„Þetta var ógeðslega gaman og góð upplifun. Að ná svona góðum árangri og góðu sæti er bara geðveikt. Geggjað að gera þetta með strákunum. Við höfðum alltaf trú á því en samt var það sjokk fyrir okkur að ná svona góðum árangri. Liðsheildin skilaði þessu, við erum allir svo góðir vinir og það small bara eitthvað saman þarna.“

Viðtal við Kristófer Breka má sjá í spilaranum að ofan.