Val­gerður réttir fram sátta­hönd

Hún fer ekki fram á afsögn formanns og framkvæmdastjórnar SÁÁ líkt og margir starfsmenn hafa krafist en vill sjá skýrari línur dregnar milli stjórna SÁÁ og heilbrigðisþjónustunnar. 

Valgerður sagði nýverið starfi sínu lausu eftir brotthvarf þáverandi forstjóra SÁÁ sem Valgerður sakar framkvæmdastjórn um að hafa bolað úr starfi. Þá hefur hún sakað sömu stjórn um óeðlileg afskipti af faglegri heilbrigðisstarfsemi SÁÁ. RÚV greindi fyrst frá endurkomu Valgerðar. Hún sé tímabundin. 

„Svo sjáum við í raun og veru hvernig stefna verður tekin. Það er ekkert komin nein tímasetning á það. Það er svo margt að gerast, það gerist eitthvað á hverjum degi,“ segir Valgerður í samtali við Vísi. Líkt og áður sé hún tilbúin til þess að draga uppsögn sína til baka ef ráðist verði í breytingar. 

Sagði upp eftir um tvær vikur

Jón Áki Jensson tók við af Valgerði sem framkvæmdastjóri lækninga en hann sagði upp störfum um tveimur vikum eftir að hann var ráðinn til SÁÁ. Heilbrigðisstofnanir samtakanna hafa glímt við mikinn mönnunarvanda og hafa læknar á Vogi verið í leyfi frá störfum. Jón sagði við Vísi í síðustu viku að hann væri eini starfandi sérfræðilæknirinn á Sjúkrahúsinu Vogi. 

Valgerður segist hafa boðið fram aðstoð sína í gær og hægt sé að líta á hana sem útrétta sáttahönd. Harðvítugar deilur hafa átt sér stað innan SÁÁ síðustu vikur milli stjórnenda og starfsfólks meðferðarsviðs annars vegar og formanns, framkvæmdastjórnar og aðalstjórnar SÁA hins vegar. Meðal annars er deilt um það hvaða afskipti stjórnir SÁÁ megi hafa af faglegu starfi sem fjármagnað er af Sjúkratryggingum.

Mikilvægar breytingar í farvatninu

„Ég vildi gefa kost á því af því að það hefur margt gerst undanfarna daga. SÁÁ, [Sjúkratryggingar Íslands] SÍ og yfirvöld eru að tala saman um ákveðnar breytingar. Það þarf að tryggja að það sé allt í góðu lagi í meðferðinni á meðan og ég ætla að leggja mitt af mörkum þar.“ Vel hafi verið tekið í þetta boð, að sögn Valgerðar. 

„Það voru allir þakklátir því. Þetta er ekki búið að vera gott en það hafa orðið breytingar sem eru mikilvægar fyrir framtíðina.“

Þar vísar hún til yfirlýsingar þess efnis að SÁÁ og Sjúkratryggingar hafi náð saman um að endurskoða samning sinn til að styrkja stjórnarhætti og skapa skýrari umgjörð um heilbrigðisþjónustu SÁÁ, líkt og það var orðað í yfirlýsingu. 

Valgerður telur að hlutaðeigandi aðilar þurfi nú frið til þess að klára þessa endurskoðun. Þá hafi forstjóri Landspítala lýst því yfir að starfsfólk hans sé til búið að styðja við meðferðarþjónustu SÁÁ ef á þarf að halda. 

Gætir þú íhugað þér að draga uppsögnina til baka jafnvel þó að framkvæmdastjórnin myndi ekki stíga til hliðar?

„Persónulega hef ég ekki sérstaka skoðun á því hver er í framkvæmdastjórn félagasamtakanna. Ég vil bara að það sé gott fólk sem vinni góða vinnu fyrir samtökin í heild. En að öðru leyti hefur það ekki bein áhrif á mín störf nema það sem hefur verið hingað til, semsagt að þau hafi vald til þess að ráða og segja upp forstjóra. En það er svona verið að vinna í þeim breytingum þannig að ég hef ekkert einhverja persónulega skoðun á því hver situr í stjórninni,“ segir Valgerður.

„Eins og var búið að ræða um þá var komið svolítið annað snið á það, þau voru meira að hugsa um heilbrigðisþjónustuna og telja sig eiga að hafa mikið eftirlit með henni og allt þetta sem er búið að ræða svo mikið. En ef það verður skýrara hér eftir þá ætti það ekki að skipta neinu máli í sjálfu sér fyrir heilbrigðisþjónustuna hver er í stjórn.“

Framkvæmdastjórn SÁÁ eigi ekki að hafa eftirlit með faglega starfinu

Raunar hafa línurnar verið skýrar að mati Valgerðar en þær verið túlkaðar með misjöfnum hætti og stjórn SÁÁ talið að hún eigi að fara með eftirlit með heilbrigðisþjónustunni sem fjármögnuð er af Sjúkratryggingum.

„Þau eru að vísa í lög félagasamtakanna eða samþykktir þeirra, ekki landslög eða neitt svoleiðis. Það er ekki þannig að þeir eigi að hafa eftirlit með heilbrigðisþjónustu, það eru aðrir.“ Það komi í hlut landlæknis og Sjúkratrygginga.

„Auðvitað vill maður að regnhlífin SÁÁ sé stuðningur við meðferðina og treysti því að þeir sem séu að vinna þar séu að gera sitt besta. Auðvitað eiga þeir að vera með eftirlit með samningum og stóru myndinni og það er ekkert óeðlilegt og það verður áfram. En það að heilbrigðisþjónustan fái að halda áfram eins og frá var horfið því að hún átti mikið traust.”

Hún bindur vonir við að SÁÁ og yfirvöld séu nú að vinna saman að úrlausn sem báðir aðilar geti verið sáttir við.

Valgerður snýr aftur til vinnu á föstudag og þurfti að stytta dvöl sína í Rotterdam þar sem hún var á ráðstefnu með fíknlæknum. 

„Það verður bara mjög gott að koma í vinnuna. Ég hlakka mikið til að hitta samstarfsfólkið mitt og sjúklingana. Það verður örugglega það besta sem kemur fyrir geðheilsuna mína núna, það er að fara aftur í vinnuna.“

„Ég vona að það komi líka aftur traust og stjórn SÁÁ treysti meðferðinni og fólkinu sem vinnur þar til þess að reka heilbrigðisþjónustuna því það er alveg full ástæða til að treysta því,“ segir Valgerður.

Hún bindi vonir við að allir leggist á eitt að halda í reynslu, þekkingu og uppbyggingu síðustu ára. 

„Ég hef með væntingar um að það finnist góð lausn fyrir heilbrigðisþjónustu SÁÁ þannig að hún fái að njóta sín áfram.“

Fréttin er í vinnslu.