Uppáhaldsborgin er Kaupmannahöfn

"Þó það hljómi ekki frumlega, verð ég að segja Kaupmannahöfn," segir Guðrún Kristjánsdóttir, kynningarstjóri Listahátíðar, aðspurð um uppáhaldsborg. "Mér líður alltaf vel þar. Ég fór fyrst þangað þegar ég var 12 ára með afa og ömmu. Afi var þá skipstjóri hjá Eimskipafélaginu og ég naut þeirra forréttinda að fá að fara með honum í siglingu. Það var ógleymanleg stund að leggja þar upp á höfninni árla morguns."

Síðan Guðrún lagði að landi tólf ára gömul í Köben eru liðin mörg ár, en borgin á sér sífellt sterkari rætur í henni. "Fyrst sér maður bara Strikið og tívolíið en svo hefur ýmislegt bæst við enda á ég marga ættingja sem búa í Kaupmannahöfn og raunar víðar í Danmörku. Þeir hafa sýnt mér annað og meira en bara það sem túrisminn hefur upp á að bjóða, eins og söguslóðir, byggingalist, bestu veitingastaðina og fleira."

Guðrúnu finnst samt alltaf jafn gaman að fara í tívolíið í Köben. "Ég fór þangað tvisvar á síðasta ári, fyrst að vetrarlagi í jólaferð og svo síðastliðið vor í dásamlega afmælisferð með æskuvinkonum mínum, sem hafa verið búsettar um allan heim. Við hittumst sumsé á miðri leið í Kaupmannahöfn og nutum lífsins lystisemda. Ég er ekki frá því að ég sé komin með fráhvarfseinkenni og verði að fara drífa mig eina ferðina enn til Köben, vonandi áður en langt um líður."