Haustmynd af garðinum.

Haustið setur svip sinn á garðana. Tré og runnar skarta gulu og rauðu en dregið hefur úr blómskrúðinu. Ein og ein blómategund lætur þó ekki koma sér á kné. Til dæmis brosir morgunfrúin enn framan í heiminn því hún endist betur en flest önnur sumarblóm. Á þessum tíma er ágætt að líta yfir garðinn með gagnrýnum augum og athuga hvort einhverju þurfi að breyta. Hvort ein planta hafi vaðið yfir aðra og lágvaxin planta jafnvel lent aftan við hávaxna. Þá verður annað hvort að ráðast í breytingar strax eða setja sér markmið fyrir næsta vor. Gera sér grein fyrir hvað má missa sig og hvaða plöntur ætti að færa til. Hvaða sumarblómaplöntur þrífast og hverjar ekki. Hverjar þola fyrstu haustlægðirnar og hverjar leggja strax upp laupana þegar á móti blæs. Upplagt er að taka mynd af garðinum á haustin til að gera sér betur grein fyrir hvaða plöntur það eru sem vaxa svo mikið yfir sumarið að vandræðum veldur. Sumar æða upp þannig að erfitt er að ganga um garðinn þegar á sumarið líður. Aðrar sá sér út og skjóta upp kollinum þar sem ekki er óskað eftir þeim. Þegar garðagróðurinn er að vakna til lífsins á vorin er allt svo sakleysislegt og smátt að erfitt er að gera sér grein fyrir því hvert útlit hans verður á haustin. Þá fögnum við hverjum sprota og hverju útsprungnu blómi en ráðum svo kannski ekki neitt við neitt þegar á líður sumar. Þessvegna er myndataka á hausti gott form til að meta árangur garðyrkjunnar.