Hrina árekstra í Reykjavík

Nokkuð var um árekstra í Reykjavík í gær að sögn lögreglu. Rétt eftir miðnætti varð tveggja bíla árekstur á gatnamótum Ljósvallagötu og Ásvallagötu. Við Norðurbrún var ekið á bifreið en tjónvaldur hvarf af vettvangi. Um níuleytið á sunnudagsmorgun rákust tveir bílar saman á Vesturlandsvegi en tjón var óverulegt. Um eittleytið var ekið utan í kyrrstæða bifreið við Reynihlíð en tjónvaldur stakk af án þess að gangast við broti sínu. Um þrjúleytið varð svo tveggja bíla árekstur á Kleppsmýrarvegi. Engin meiðsl urðu á fólki í þessum umferðaróhöppum.