Garcia fer ekki til Túnis

Jaliesky Garcia mun ekki fara með íslenska landsliðinu í handknattleik á HM í Túnis sem hefst síðar í mánuðinum að sögn Viggós Sigurðssonar landsliðsþjálfara í samtali við íþróttadeild Stöðvar 2 og Sýnar nú fyrir stundu.  Einar Þorvarðarson, framkvæmdastjóri HSÍ, talaði við Garcia seint í gærkvöldi en þá var leikmaðurinn staddur á Púertó Ríkó. Ekkert hafði náðst í Garcia í nokkrar vikur þrátt fyrir ítrekaðar tilraunir. Garcia var á Kúbu við jarðarför föður síns og fór þaðan til Púertó Ríkó í frí með eiginkonu sinni. Að sögn Viggós er hugsanlegt að Garcia hafi leikið sinn síðasta landsleik undir sinni stjórn.