Hipphoppskór og sjálflýsandi úr

Ég get ekki sagt að ég tengist flíkunum í fataskápnum mínum tryggðaböndum. Í augnablikinu eru það þó kannski tveir hlutir sem ég held svolítið upp á. Það eru annars vegar brúnir leður Nike körfuboltaskór sem eru annað hvort endurgerð af gamalli týpu frá sama framleiðanda eða þá að ég hef verið plataður til þess að kaupa gamlar birgðir. En hvað um það, þeir hrinda ótrúlega vel frá sér öllum vökva og henta því prýðisvel í slabbið hér í borg. Einnig eru þeir gæddir svokölluðu "Nike Air" kerfi sem byggist, að ég held, á því að loftpúðum er komið fyrir í sólanum sem á að veita aukna ánægju þegar þrammað er um göturnar," segir Margeir en skórnir rifja upp gamlar minningar. "Þeir minna mig einhverra hluta vegna á ákveðið tímabil í lífi mínu - þegar ég var ungur og reiður hipphoppari í Breiðholtinu. Þá þótti þetta nokkuð fínt - en í mjög litlum hópum reyndar. Flestum öðrum þótti þetta ekki vera merkilegur skófatnaður."

"Svo er það tölvustýrða Casio-úrið mitt sem er mörgum fínum eiginleikum gætt. Það er úr ryðfríu stáli og þolir neðansjávarköfun, allt að eitt hundrað metra, ásamt því að vera með innbyggðum vekjara og skeiðklukku, sem getur einnig talið niður. Síðast en ekki síst er hægt að ýta einum af hnöppunum inn til að lýsa úrið upp - sem er mjög hentugt, til dæmis þegar þú vilt vita hvað klukkan er í myrkri," segir Margeir að lokum.