Okkur lá of mikið á, sagði Dagur

"Við lögðum mikið á okkur en vorum að gera einföld mistök, skjóta of snemma og fengum hraðaupphlaup í bakið á okkur og það gengur ekki," sagði landsliðsfyrirliðinn Dagur Sigurðsson súr á svipinn. "Við hefðum átt að slaka betur á þegar við vorum í sókn og lið eins og Rússland refsar grimmilega fyrir öll mistök. Það vantar herslumuninn í þetta hjá okkur," sagði Dagur en hefur liðið eitthvað að gera í milliriðil? "Ekki til þess að ná stórafrekum en við sjáum það líka að við erum ekki langt frá þessum liðum."