Allar fæddar eftir að hún byrjaði

Sigrún Skarphéðinsdóttir, leikmaður kvennaliðs KR, lék sinn 300. deildarleik gegn Haukum á dögunum og komst þar í hóp með Önnu Maríu Sveinsdóttur, sem fyrr í vetur varð fyrsta konan til þess að leika 300 leiki í efstu deild. Sigrún fékk afhentan blómvönd í hálfleik á leik KR og Tindastóls í Intersportdeild karla. Anna María hefur nú leikið 311 leiki, alla fyrir Keflavík, en Sigrún hefur leikið leikina 300 fyrir Hauka (116), Keflavík (15), Tindastól (60), Breiðablik (18) og KR en 300. leikurinn var 91. leikur hennar fyrir KR í efstu deild og einmitt á móti Haukum þar sem hún lék sinn fyrsta leik 16. desember 1983, fyrir 22 árum síðan. Þess má geta að íslensku leikmenn Haukaliðsins í dag voru ekki fæddir þá því elsti leikmaður Haukaliðsins er fædd 1985 en Sigrún verður 35 ára á þessu ári. Sigrún hóf ferilinn einmitt með Haukum og varð bikarmeistari með Hafnfirðingum þann veturinn en hún skipti yfir í KR árið 1998 og átti sinn þátt í velgengni KR þegar liðið vann tvöfalt árin 1999, 2001 og 2002. Sigrún varð einnig tvöfaldur meistari með Keflavíkurliðinu 1993. Sigrún er níundi stigahæsti leikmaður efstu deildar kvenna frá upphafi með 2.276 stig í leikjunum 300.