Með lýríkina í ljóranum

Sandblástursfilmur í glugga bjóða upp á óendanleg frumlegheit. Frumlegheit og sniðugar lausnir eru það sem allir vilja inn á heimilin sín og nú getur fólk látið hugmyndaflugið ráða þegar kemur að rúðum í anddyri og baðherbergjum. Hjá Memó ehf. eru fáanlegar sandblástursfilmur í glugga sem hægt er að fá eftir máli og að hugmyndum hvers og eins. "Þetta eru filmur sem eru settar í gluggana þannig að rúðan lítur út eins og sandblásin og svo skerum við út í filmuna það sem fólk vill," segir Einar Sigurðsson, framkvæmdastjóri Memó. "Í anddyrinu er vinsælt að vera með húsnúmer og nöfn þeirra sem búa í húsinu og í baðherbergisgluggana eru ljóðlínur og málshættir mjög vinsæl. Það allra nýjasta er svo að við getum skorið út ljósmyndir í filmuna. Við erum að fá margar sniðugar pantanir og hvetjum fólk til að gefa hugmyndafluginu lausan tauminn og hafa þetta frumlegt og persónulegt."