Staðgóðir og ljúffengir grautar

11. mars 2005 00:01

Hrísgrjónagrautur

1 l vatn

200 g hrísgrjón

1 l mjólk

1 tsk. salt

Grjónin eru soðin í vatninu og söltuð. Mjólkinni er bætt út í smátt og smátt og látin sjóða. Grauturinn er borðaður með kanilsykri og kaldri mjólk eða rjómablandi út á.

Fjallagrasamjólk

40 g fjallagrös

1½ l mjólk

1 tsk. salt

2-3 msk. púðursykur

Grösin eru þvegin vel. Þegar mjólkin sýður eru þau látin út í og soðin með í 5 mínútur. Salt og sykur látið í.

Eggjamjólk

1½ l mjólk

1 msk. hveiti

20 g rúsínur

1-2 egg

50 g sykur

1 tsk. salt

vanilludropar

Mjólkin soðin með rúsínunum í fimm mínútur. Hveitið hrært út í vatni og jafningurinn er síðan hrærður út í sjóðandi mjólkina. Eggin eru hrærð með sykrinum og vanillunni létt og ljós og súpunni smátt og smátt hrært út í.

Makkarónusúpa

1 1/2 l mjólk

10 stk. makkarónulengjur

1 tsk. salt

2 msk. sykur

Mjólkin er hituð. Makkarónurnar brotnar út í þegar sýður. Hrært stanslaust þar til sýður aftur. Súpan látin malla í 20 mínútur og hrært í af og til. Söltuð og sykruð.

Flauelisgrautur

1 1/2 l mjólk

1 tsk. salt

2 msk. sykur

vanilla

3 msk. kartöflumjöl sem hrært er út í vatnslögg.

Mjólkin er hituð að suðu. Salt, sykur og vanilla sett í. Kartöflumjölsblandan hrærð út í og potturinn tekinn strax af á eftir. Borðaður með kaldri mjólk eða saftblöndu.

Sængurkonugrautur

1 1/2 l mjólk

1 tsk. salt

160 hrísmjöl sem hrært er út í vatnslögg.

Farið að eins og með flauelisgrautinn nema hvað hrísmjölsgrautinn þarf að sjóða í um það bil 10 mínútur. Góður með kanilsykri og mjólk eða saftblöndu.

Sagógrjónagrautur

1 1/2 l mjólk

150 g sagógrjón

2 msk. sykur

1 tsk salt

1 dl rúsínur

1 kanilstöng

2 msk. mjólk

Mjólkin hituð með rúsínunum og kanilstönginni. Grjónin hrærð út í, ásamt sykri og salti. Soðið þar til grjónin eru orðin glær. Gott er að bera rjómabland með grautnum.

Kakósúpa

1 1/2 l mjólk

2 msk. kakó

3 msk. sykur

1/2 tsk. salt

2 matsk. hveiti hrært út í vatnslögg

Mjólkin er hituð. Kakó, sykur og salt hrært saman. Hrært út með smá hluta af mjólkinni og þeirri blöndu hellt út í pottinn. Hveitijafningurinn hrærður út í og potturinn tekinn fljótlega af hellunni. Súpan borin fram með tvíbökum eða kringlum.