Stórverslun en líka hverfisbúð

"Við erum búin að breyta öllu og hér er allt alveg nýtt og fínt. Skipulagið hefur líka breyst. Við vorum með opnunartilboð þegar verslunin opnaði og það var rosalega mikið að gera. Fólk hefur tekið afskaplega vel á móti okkur," segir Fanney Kim Du, verslunarstjóri Nóatúns-verslunarinnar.

Fólkið í nágrenni verslunarinnar hefur greinilega saknað Nóatúnsins síns en Fanney saknaði líka viðskiptavinanna. "Þetta er stór verslun en samt hverfisbúð. Ég kannast við flesta sem versla hér og það er voðalega gott að vera komin aftur til starfa," segir Fanney en hún hefur unnið í Nóatúni í tæplega tuttugu ár.

"Ég byrjaði þegar ég var þrettán ára en ég hef reyndar bara verið verslunarstjóri í eitt og hálft ár. Fyrir það var ég til dæmis aðstoðarverslunarstjóri og innkaupastjóri. Mér finnst mjög gaman að vera ekki að gera alltaf það sama. Ég hef gert ýmislegt innan verslunarinnar og það er gott að hafa fjölbreytni í starfinu."

"Við höfum aukið úrval af grænmeti og kælivöru þannig að nú bjóðum við upp á meira magn af ferskum vörum. Síðan er bakarí í búðinni þar sem tveir starfsmenn vinna við bakstur og afgreiðslu -- en áður þurfti fólk að hjálpa sér sjálft. Kjötborðið er á sama stað en er nú orðið stærra og flottara -- eins og öll búðin. Það er voða gaman að vinna hér og allir ánægðir að vera komnir aftur," segir Fanney sem hlær dátt þegar blaðamaður spyr hverrar þjóðar hún er. "Það má segja að ég sé 75 prósent Kínverji en ég fæddist í Víetnam. Ég fylgdi með foreldrum mínum til Íslands og fékk ekki að ráða neinu," segir Fanney glöð í bragði og að vonum ánægð með hið nýja og endurbætta Nóatún.