Áfram lágir vextir

Hann segir að bandaríski seðlabankinn haldi líklega áfram að hækka vexti jafnt og þétt en það virðist hafa lítil sem engin áhrif á langtímavexti þar í landi. Það sama hafi verið að gerast á Íslandi, þar sem langtímavextir hafi lækkað undanfarin misseri á meðan Seðlabankinn hafi hækkað stýrivexti sína verulega. Lúðvík telur líklegt að Seðlabanki Íslands muni hækka stýrivexti sína samhliða útgáfu Peningamála 29. september næstkomandi. Greining Íslandsbanka spáir að vextirnir verði komnir upp í tíu prósent fyrir árslok. Allt bendi til þess að munurinn á stýrivöxtum hér á landi og evrusvæðinu aukist á næstunni. Munurinn verði kominn í átta prósent um áramótin og fari jafnvel enn hærra á næsta ári. Stýrivextir Seðlabankans eru nú 9,5 prósent og hafa hækkað reglulega frá því í maí 2004, síðast í júní. Lúðvík segir að aukinn vaxtamunur sé tímabundinn og stafi af sérstökum aðstæðum í íslensku efnahagslífi. Það sé eðlilegt að um einhvern viðvarandi vaxtamun sé að ræða sem feli í sér álag vegna smæðar markaðarins, gengis krónunnar og fleiri þátta. "Þessi mikli vaxtamunur við útlönd sem við sjáum núna þýðir að það er vænlegt að geyma fé á Íslandi og á það að sjálfsögðu jafnt við Íslendinga og aðra. Þess vegna er mikil eftirspurn eftir íslensku krónunni og hún því hátt metin. Gengi krónunnar er hærra en fær staðist til lengdar og mun lækka þegar dregur úr innflæði fjármagns," segir hann