Hver er mörgæs?

Andrej Kúrkov: Dauðinn og mörgæsin. Bjartur 2005.







Viktor, misheppnaður rithöfundur býr í blokkaríbúð með mörgæs sem honum áskotnaðist þegar eigum gjaldþrota dýragarðsins í Kiev var útdeilt. Sögusviðið er Úkraína í öllu ruglinu kommúnismans. Gæfan fer að blasa við Viktori þegar hann er settur í það verkefni af ritstjóra dagblaðs að skrifa minningagreinar um menn sem eru ekki látnir – en taka síðan upp á að deyja með dularfullum hætti.



Innan tíðar lítur út fyrir að Viktor sé lykilmaðurinn í stóru samsæri, eða er hann blóraböggullinn – the fall guy eins og það heitir á mafíumáli?



Svona er plottið í þessari ólíkindalegu skáldsögu frá Úkraínu. Maður þyrfti sjálfsagt að vera innfæddur til að skilja allar tilvísanirnar til hlítar. Stundum virkar bókin dálítið ruglingsleg. Þunglynd og hjartveik mörgæsin er með einhverjum hætti lykillinn að þessu, hópdýr sem hefur orðið strand í þröngri blokkaríbúð – og þá er eiginlega spurningin hver er mörgæs?