Söngleikur um Nemó

Disney vinnur nú hörðum höndum við að gera söngleik eftir teiknimyndinni vinsælu, Leitinni að Nemó, en frumsýning er áætluð í janúar á næsta ári. Þetta er í fyrsta skipti sem Disney hefur gert söngleik úr teiknaðri mynd sem ekki var ætluð sem söngvamynd. Í sýningunni, sem verður um hálftíma löng, verður notast við teiknaða bakgrunna og sérstaka lýsingar- og hljóðtækni til að vekja neðansjávarveröld Nemó til lífs, en Disney hefur fengið reyndustu listamenn í geiranum til að leggja hönd á plóg. Aðalpersónur myndarinnar munu synda fram á sjónarsviðið sem brúður, svipaðar þeim sem notaðar voru í söngleiknum um konung ljónanna. Ef vinsældir söngleiksins verða eitthvað í líkingu við viðtökurnar sem teiknimyndin hlaut má gera ráð fyrir að budda Disney bólgni nokkuð, en myndin rakaði til sín milljónir á sínum tíma.