Barði mann í afbrýðiskasti

Tuttugu og sex ára gamall karlmaður var dæmdur í Héraðsdómi Reykjavíkur í gær í fjögurra mánaða fangelsi fyrir líkamsárás. Tveir mánuðir refsingar hans eru skilorðsbundnir til þriggja ára.

Árásin átti sér stað í maí á síðasta ári. Árásarmaðurinn og fórnarlamb hans störfuðu á þeim tíma saman á skemmtistað í Hafnarstræti. Kvöldið áður en árásin varð hafði unnusta árásarmannsins skýrt honum frá því að hún hefði um nóttina haldið framhjá honum með fórnarlambinu. Hann sagði fyrir dómi að hann hefði tekið tíðindin mjög nærri sér og bar fyrir sig minnisleysi um árásina vegna taugaáfalls sem hann sagðist hafa fengið eftir fregnirnar um framhjáhaldið.

Samkvæmt framburði vitna voru átökin mjög einhliða enda árásarmaðurinn um tveir metrar á hæð og auk þess með brúnt belti í bardagaíþrótinni jiu-jitsu. Hann barði höfði fórnarlambsins við barborð, sló hann ítrekað með hnefahöggum og sparkaði bæði í andlit og líkama hans með þeim afleiðingum að hann hlaut fjölmarga og alvarlega áverka. Fórnarlambið sagðist fyrir dómi ekki enn búinn að ná sér eftir árásina, hvorki líkamlega né andlega.

Auk fangelsisdómsins þarf árásarmaðurinn að greiða fórnarlambinu 553.777 krónur.