Dagsbrún gerir 1,5 milljarða króna varúðarfærslu

Dagsbrún bókfærir tap af Wyndeham í varúðarfærslu og ætlar að selja félagið. Þetta kemur fram í afkomuviðvörun sem send var Kauphöll eftir lokun markaða í gær. Í dag á að ganga frá skiptingu félagsins og skipulagsbreytingum á fundi hluthafa.

Stjórn Dagsbrúnar hefur ákveðið að ganga til viðræðna við mögulega kaupendur um sölu á meirihluta hlutafjár í Daybreak Acquisitions Ltd., móðurfélagi Wyndeham press Group PLC, þriðja stærsta prent- og samskiptafyrirtæki Bretlands.

Í afkomuviðvörun félagsins til Kauphallar Íslands eftir lokun markaða í gær kemur fram að rekstraráætlanir Dagsbrúnar sem gerðar voru við kaupin á Wynde-ham í sumar fyrir þetta ár komi ekki til með að standast. Er það sagt skýrast af breytingum í starfsumhverfi á breskum prentmarkaði sem til séu komnar af aukinni samkeppni og mikilli samþjöppun fyrirtækja á því sviði.

"Telur stjórn fyrirtækisins rétt að gera ráð fyrir 1,5 milljarða króna varúðarfærslu vegna eignarhlutar félagsins í Daybreak," segir í tilkynningu félagsins. Um leið er bent á að í skiptingaráætlun Dagsbrúnar í september hafi viðskiptavild upp á einn milljarð króna verið afskrifuð í kjölfar virðisrýrnunarprófs á eign félagsins í Kögun hf. "Þá hefur fallið til einskiptiskostnaður vegna skiptingar og endurskipulagningar félagsins. Loks er rekstur 365 miðla ehf. undir áætlunum fyrstu níu mánuði ársins."

Þórdís Sigurðardóttir, stjórnarformaður Dagsbrúnar, segir að útlitið fyrir rekstur fjarskipta- og fjölmiðlahluta félagsins í framtíðinni sé þó gott. Sala á hlut félagsins í Wyndeham myndi létta mikið á skuldsetningu samstæðunnar og skerpa áherslur í rekstrinum. Þá sé stefnt að því að selja allan hlut félagsins í Wyndeham á næstu 24 mánuðum. Dagsbrún hefur ráðið fyrirtækjaráðgjöf Landsbankans til aðstoðar við söluna.