Eragon berst gegn hinu illa á drekabaki

Ævintýramyndin Eragon verður frumsýnd á heimsvísu á föstudaginn og þar með lýkur langri bið aðdáenda bóka Christopher Paolini eftir því að sjá hetjuna Eragon og drekann Saphiru lifna við á hvíta tjaldinu.

Óhætt er að segja að hér sé á ferðinni sígilt ævintýri og grunnstef sögunnar eru gamalkunn. Hér segir frá hinum unga Eragon sem verður óvænt eina von íbúa landsins Alagaesia um frið og farsæld eftir að hann finnur drekaegg og binst í framhaldinu drekanum Saphiru tryggðarböndum.

Á árum áður héldu drekariddarar uppi lögum og lofum í landinu en það breyttist sviplega þegar einn úr þeirra röðum, Galbatorix, ákvað að útrýma félögum sínum og sölsa öll völd undir sig.

Áður en Galbatorix komst til valda færðu drekarnir riddurum sínum ofurkrafta og gerðu þá jafnvel ódauðlega. Þeir voru sem sagt ósigrandi og nú bíður það Eragons og Saphiru að bjóða hinum illa einvaldi birginn og hefja reglu drekariddaranna aftur til vegs og virðingar. Eragon nýtur leiðsagnar gamals drekariddara, Broms, sem tekur að sér að leiðbeina unga manninum þegar hann eygir nýja von.

Nýliðinn Ed Speleers leikur Eragon en hann er umkringdur þungavigtarfólki í öðrum aðalhlutverkum. Jeremy Irons leikur Brom, John Malkovic fer með hlutverk hins illa Galbatorix og Robert Carlyle bregður sér í líki hins öfluga seiðskratta Durza. Breska leikkonan Rachel Weisz ljær svo tölvuteiknaða drekanum Saphiru rödd sína.