Serena í erfiðleikum

Serena Williams var ekki langt frá því að fara sömu leið og systir hennar Venus í fyrstu umferð opna ástralska meistaramótisins í tennis í dag, en vann þó nauman sigur á lítt þekktum andstæðingi sínum Li Na. Mari Sharapova og Lindsey Davenport unnu sína leiki nokkuð örugglega og eru komnar áfram.

Serena Williams er aðeins í tíunda sæti heimslistans um þessar mundir eftir að hafa barist við erfið meiðsli á síðasta ári. Hún var ekki sátt við sjálfa sig eftir nauman sigur í dag, 6-3, 6-7, (1-7) 6-2. "Ég hélt illa pressuna í dag og gerði ekki það sem ég þurfti að gera. Ég var bara að spila illa og var orðin gröm við sjálfa mig í restina. Það er greinilega mjög langt í land hjá mér enn," sagði Williams, sem skömmu áður horfði á eftir systur sinni úr leik í fyrstu umferðinni.