Nadal sneri aftur með sigri

Spænski tenniskappinn Rafael Nadal átti vel heppnaða endurkomu úr meiðslum í gær þegar hann sigraði naumlega á opna Marseille-mótinu í tennis sem fram fór í Frakklandi, þar sem hann hafði betur gegn Oliver Rochus 4-6, 6-2 og 7-5.

Hinn 19 ára gamli Nadal hefur verið frá keppni síðan í október vegna fótameiðsla, en hann er í öðru sæti á heimslistanum. "Ég hef nú oft verið ferskari, en það var frábært að ná að vinna fyrsta leikinn á árinu," sagði Nadal og bætti því við að hann ætti enn nokkuð í land með að komast í gott form eftir meiðslin.