Keflvíkingar í úrslit

Keflvíkingar tryggðu sér í kvöld sæti í úrslitaleiknum í Powerade bikarnum í körfubolta með því að leggja Skallagrímsmenn 88-81í Laugardalshöll. Keflvíkingar höfðu undirtökin í fyrsta leikhluta en eftir að hafa verið undir fram í byrjun lokaleikhlutans, spýttu suðurnesjamenn í lófana og unnu sannfærandi sigur á Borgnesingum.

Jermain Williams var atkvæðamestur í liði Keflavíkur með 24 stig og hirti 14 fráköst, Arnar Freyr Jónsson skoraði 17 stig og gaf 8 stoðsendingar og Thomas Soltau skoraði 15 stig.

Hjá Skallagrími var Jovan Zdravevski stigahæstur með 29 stig, Darrel Flake skoraði 18 stig og hirti 11 fráköst og Pétur Már Sigurðsson skoraði 11 stig.