Vöknuðu við hávaðann í reykskynjara

Reykskynjari gæti hafa bjargað lífi hjóna á fimmtugsaldri þegar eldur kom upp í íbúðarhúsinu Búlandi, skammt sunnan Hjalteyrar við Eyjafjörð, laust fyrir klukkan sjö í morgun. Hjónin, sem eru 45 og 47 ára, vöknuðu við hávaðann í reykskynjaranum. Þau komust sjálf út úr brennandi húsinu og hringdu síðan eftir hjálp.

Slökkvilið, lögregla og sjúkralið frá Akureyri komu fljótlega á vettvang og voru hjónin til öryggis flutt á sjúkrahús til skoðunar en þeim mun ekki hafa orðið meint af. Greiðlega gekk að slökkva eldinn en húsið, sem er einnar hæðar steinhús með risi og kjallara, er mikið skemmt af völdum hita og sóts. Upplýsingar um eldsupptök liggja ekki fyrir, að sögn lögreglunnar á Akureyri.