3 og 5 mánaða fangelsi fyrir fjárdrátt og hylmingu

Héraðsdómur Norðurlands eystra dæmdi í dag tvo menn um tvítugt í 3 og 5 mánaða skilorðsbundið fangelsi fyrir fjárdrátt og hylmingu. Mennirnir voru starfsmenn í 2 verslunum á Akureyri þegar brotin voru framin.

Annar tók út vörur úr íþróttavöruverslun án þess að greiða fyrir eða skrifa á sig að andvirði tæplega 140 þúsund króna. Auk þess tók hann sér í tvígang peninga úr sölukassa verslunarinnar að fjárhæð 10 þúsund krónur. Hinn maðurinn dró sér vörur úr raftækjavöruverslun fyrir samtals rúmlega 670 þúsund krónur.

Sá fyrrnefndi framdi brot sín frá sumri 2005 til 21. desember sama ár og hlýtur 3 mánaða skilorðsbundið fangelsi. Sá síðarnefndi framdi brot sín frá 2003 til loka árs 2005 og hlýtur 5 mánaða skilorðsbundið fangelsi. Viðurkenndu mennirnir brot sín. Er þeim gert að greiða sakarkostnað.