Eftirvænting við Hagatorg

Samstarf Sinfóníuhljómsveitarinnar og Listaháskóla Íslands er meðal annars fólgið í árlegum tónleikum þar sem ungir og upprennandi tónlistarmenn fá að spreyta sig með hljómsveitinni.

Á morgun koma þrír ungir listamenn fram í Háskólabíói á tónleikum þar sem stemningin verður án efa lituð af eftirvæntingu og æskumóð.

Fiðluleikarinn Eygló Dóra Davíðsdóttir, Grímur Helgason klarinettuleikari og Egill Árni Pálsson tenór voru valin í sérstakri forkeppni fyrr í vetur. Þar tóku ellefu nemendur úr tónlistardeild Listaháskóla Íslands, Tónlistarskólans í Reykjavík, Söngskólans í Reykjavík og Nýja tónlistarskólans þátt og var dómnefnin samhljóma en hana skipuðu Karólína Eiríksdóttir tónskáld, formaður, Hafliði Hallgrímsson tónskáld og selló-leikari, Sigrún Hjálmtýsdóttir söngkona, Ármann Helgason klarínettuleikari, Anna Guðný Guðmundsdóttir píanóleikari og Rumon Gamba, aðalhljómsveitarstjóri Sinfóníuhljómsveitar Íslands.

Grímur Helgason segist eftirvæntingarfullur vegna tónleikanna en þetta er stærsta verkefni hans til þessa. Hann hefur á undanförnum árum leikið með margs konar tónlistarhópum, þar á meðal Kammersveitinni Ísafold, Hamrahlíðarkórnum, Sinfóníuhljómsveit unga fólksins, Sinfóníuhljómsveit Norðurlands og djasshljómsveitunum Glymskröttunum og Hrafnasparki, auk margvíslegra samleikshópa innan Listaháskólans. „Ég hef mest fengist við klassíska tónlist en hef aðeins komið við í djassinum líka,“ útskýrir Grímur.

Grímur stundar nám við Listaháskóla Íslands undir handleiðslu Einars Jóhannessonar en mun ljúka prófi í vor og hyggur á frekara nám erlendis þegar fram líða stundir. Á tónleikunum mun Grímur leika klarinettukonsert eftir Gerald Finzi ásamt strengjasveit en hann segir verkið mjög fallegt. „Þetta verk er í miklu uppáhaldi hjá mér núna en Einar, kennarinn minn, vakti áhuga minn á því. Sjálfur kynnist hann þessu verki þegar hann var við nám í London. Þetta er ekki mjög þekkt verk, nema máski þar í landi og þetta er sennilega frumflutningur þess hér.“

Grímur kveðst lítið hafa leitt hugann að því hvaða þýðingu tónleikar sem þessir hafa fyrir hann í framtíðinni. „Það er bara rosalega gaman að fá tækifæri til þess að taka þátt í þessum tónleikunum hér og nú. Í framtíðinni verður þetta ábyggilega bara góð minning og reynsla.“

Egill Árni mun syngja aríur úr I Lombardi, Rigoletto og La Traviata eftir Verdi á tónleikunum og Eygló Dóra leikur fiðlukonsert eftir Max Bruch.

Auk þess mun Sinfóníuhljómsveitin leika forleikinn vinsæla úr Vilhjálmi Tell. Hljómsveitarstjóri er Finninn Esa Häkkilä en hann stjórnaði Sinfóníuhljómsveit Íslands á Myrkum músíkdögum árið 2005.

Sem fyrr hefjast tónleikarnir í Háskólabíói kl. 19.30 en þess skal getið að allir sem framvísa námsmannaskírteinum fá miða á hálfvirði. - khh