Nýtt söngvaskáld á svið

Kristján Þorvaldsson, fyrrverandi ritstjóri Mannlífs, tekur þátt í trúbadorkeppni á Sportbarnum.

„Ég vona að þetta verði ekki eitthvert „cover-drasl“. Er ekki nóg komið af Idol og X-Factor?“ spyr Kristján Þorvaldsson, fyrrverandi ritstjóri og söngvaskáld. Kristján er meðal þátttakenda í Stóru trúbadorkeppninni sem fram fer á Sportbarnum innan tíðar.

Fréttablaðið hefur sagt frá því að keppni þessi sé í vændum en að sögn Friðriks Indriðasonar, eins aðstandenda, hefur þátttaka farið fram úr björtustu vonum. Til stóð að átta listamenn kepptu eftir útsláttarfyrirkomulagi en þegar hafa fjórtán skráð sig til leiks. Lýkur skráningu nú á fimmtudag og er verið að endurskipuleggja vegna góðrar þátttöku.

Friðrik segir nokkra þekkta einstaklinga komna á skrá. Þeirra á meðal er Kristján Þorvaldsson, hinn kunni fjölmiðlamaður, sem nýverið lét af störfum sem ritstjóri Mannlífs og nýtur nú lífsins í langþráðu fæðingarorlofi. Aðspurður hvort hann verði með gítar sér til fulltingis svarar hann dularfullur: „Mér skilst að það sé ekki flygill á staðnum. Annars er þetta nú bara tómstundagaman föður í orlofi. Að slá á gígju og syngja með. Smá baðstofustemning.“

Tónlistarhæfileikar Kristjáns hafa ekki farið hátt en hann segist þó hafa troðið upp víða, óumbeðinn sem og pantaður. „Já, en ekki skal ég segja hvort það hafi verið öðrum til skemmtunar en sjálfum mér,“ segir Kristján hinn hógværasti.

Málin vandast þegar Kristján er beðinn að skilgreina nánar þá tónlist sem hann semur og flytur. „Hvað kallar hann Hörður þetta aftur? Já, söngvaskáld. Þetta er svona sígildur, þunglyndislegur söngvaskáldakliður à la Hörður Torfa með smá Bellman-ívafi.“