Gísli Örn ráðinn í breska Þjóðleikhúsið

„Það er mikill heiður að vera boðið að leika í þessu virta leikhúsi,“ segir Gísli Örn Garðarsson leikari, sem hefur verið ráðinn í burðarhlutverk í leikritinu Matter of Life and Death, sem sett verður á fjalirnar í breska Þjóðleikhúsinu í maí.

Verkið byggir á samnefndri og víðfrægri bíómynd frá 1946 með David Niven í aðalhlutverki en sviðsuppfærslan er í höndum Tom Morris og Emmu Rice. Eins og þekkt er orðið vöktu Gísli Örn og Vesturport mikla athygli í Englandi með Rómeó og Júlíu og Woyzcek, auk þess sem hann lék í Hamskiptum Kafka þar ytra. „Ég býst við að þetta sé afleiðing af þeim sýningum og er enn eitt ævintýrið á ferlinum. Þetta er umfangsmikil sýning, sýnd á stærsta sviði leikhússins og með mörgum þekktum nöfnum úr bresku leikhúsi.“

Gísli heldur utan 18. mars en verkið verður frumsýnt 3. maí og er sýnt til 21. júní. Þótt hann hafi leikið á ensku oft áður segir Gísli það alltaf vera þröskuld að leika á annarri tungu en móðurmálinu. „Þetta er alltaf ákveðinn þröskuldur og maður þarf að undirbúa sig sérstaklega vel.“

Þrátt fyrir velgengnina á Englandi býst Gísli Örn þó ekki við að flytja þangað. „Það stendur ekki til í bráð að minnsta kosti. Ég hef samþykkt að taka þátt í nokkrum spennandi verkefnum hér heima næsta vetur.“