Græna ljósið tryggði sér sigurmyndina á Cannes

Ísleifur B. Þórhallsson hjá dreifingarfyrirtækinu Græna Ljósið gerðu góða ferð til Cannes en þar tryggðu þeir sér sýningarrétt á mörgum af eftirtektarverðustu kvikmyndum hátíðarinnar.

Stóru fréttirnar eru eflaust þær að rúmenska sigurmyndin 4 luni, 3 saptamini si 2 zile eða Fjórir mánuðir, þrjár vikur, tveir dagar verður tekin til sýningar á allra næstu misserum. Miklar vangaveltur hafa verið meðal kvikmyndaáhugamanna á netinu hvort örlög hennar yrðu þau sömu og hjá mörgum öðrum evrópskum verðlaunamyndum; að hún yrði fáanleg á næstu myndbandaleigu eftir dúk og disk.

„Við tryggðum okkur dreifingarréttinn í blábyrjun hátíðarinnar. Ég horfði á myndina á fyrsta degi mínum í Cannes, fór á tvö sýningu, mætti á fund klukkan fjögur með útgáfufyrirtækinu og sendi inn tilboð í kjölfarið sem var samþykkt nánast samstundis," segir Ísleifur og telur þessi kaup ef til vill varpa hvað bestu ljósi á hlutverk Græna ljóssins. „Við höfum lagt mikla áherslu á að fá myndir hingað til lands sem að öðrum kosti myndu aldrei rata í íslensk kvikmyndahús," útskýrir hann.

Ísleifur útilokar ekki að reynt verði að fá leikstjóra myndarinar, Cristian Mungiu, til að koma og verða við frumsýningu myndarinnar. „Við höfum enda gert mest af því að kynna fyrir gestum okkar fólkið á bakvið myndirnar. Hins vegar er ég viss um að myndin sjálf eigi eftir að vekja töluverða athygli vegna umfjöllunarefnisins," bætir Ísleifur við en hún fjallar um unga konu sem lætur framkvæma á sér ólöglega fóstureyðingu í Rúmeníu skömmu fyrir fall Nicolae Ceaucescu og kommúnistaflokksins.

En það var ekki bara rúmenska sigurmyndin sem Græna ljósið festi kaup á við strendur við Miðjarðarhafsins. Ísleifur klófesti einnig meðal annars Sicko, nýjustu heimildarmynd hins umdeilda Micheal Moore og My Blueberry Nights en hún er frumraun söngkonunnar Noruh Jones á hvíta tjaldinu. Síðan er nokkuð víst að heimildarmyndin Rebellion: The Litvinenko Case eigi eftir að vekja mikla athygli.

Hún fjallar um fimm síðustu árin í lífi rússneska njósnarans Alexander Litvinenko sem lést eftir að eitrað var fyrir honum en meðal þeirra sem hafa verið bendlaðir við morðið eru Vladimir Putin, forseti Rússlands. Þá er nokkuð ljóst að Terror's Advocate eftir Barbet Schroeder á einnig eftir að vekja upp spurningar en hún fjallar um lögfræðinginn Jacques Vergés sem hefur tekið að sér að verja menn á borð við Slobodan Milosevic, Mao Tse Tung og sjálfan Saddam Hussein.