Reyfisskáli reistur við Norræna húsið

Stærðarinnar glerskáli verður reistur við hliðina á Norræna húsinu í ágúst. Skálinn er rúmlega 700 fermetrar að stærð, jafn stór Norræna húsinu sjálfu, og rúmar þúsund manns. Hann verður reistur í tilefni Reyfis-hátíðarinnar sem Norræna húsið stendur fyrir. Hátíðin stendur yfir í níu daga, 18. til 26. ágúst.

„Það verður mjög fjölbreytt dagskrá. Mikið af tónlist og eitthvað fyrir alla aldurshópa, börn, unglinga og fullorðna,“ segir Ellen Marie Fodstad sem vinnur við að skipuleggja hátíðina. „Meðal annars verður sirkusskóli fyrir börn. Listamenn sem hafa starfað með sirkus Cirkör í Svíþjóð kenna krökkum sirkuskúnstir. Þau fá að æfa sig í að ganga á línu og fleira skemmtilegt.“

Enn er verið að skipuleggja dagskrána og beðið eftir staðfestingum frá ótal erlendu listafólki. Dagskráin verður betur kynnt í byrjun næsta mánaðar. Það sem búið er að staðfesta er fyrrnefndur sirkusskóli, danski rithöfundurinn Carsten Jensen og norska hljómsveitin Magnet.

Hátíðin mun ná yfir hvers konar menningu. Þarna verður tónlist af ýmsu tagi, myndlist, vídeóverk og innsetningar, hönnun og arkitektúr. Þá munu margir rithöfundar heimsækja hátíðina, einnig verða sirkus og danssýningar. Auk þessa alls verður sérstök áhersla lögð á norræna matargerðarlist.

„Það verður rosalega mikið af skemmtilegu í gangi, húsið allt verður undirlagt auk glerskálans. Flestir viðburðirnir verða líka ókeypis. Það verða líklega bara stóru tónleikarnir sem verður aðgangseyrir á,“ segir Ellen.