Rándýr hauskúpa

Myndlistarmaðurinn Damien Hirst opnaði í byrjun júnímánaðar sýningu þar sem hann sýnir dýrasta listaverk sem hefur verið búið til. Verkið er hauskúpa í fullri stærð úr títaníum alþakin demöntum. Á hauskúpunni eru 8601 demantar sem eru samtals 1106,18 karöt.

Ásett verð hauskúpunnar er 50 milljónir punda sem eru um 6 milljarðar íslenskra króna. Ef verkið selst á þessu verði er Hirst kominn í sama verðflokk Picasso.

Damien Hirst varð í júnímánuði sá núlifandi listamaður sem á verðhæsta listaverkið. Verk hans Lullaby Spring, eða Vögguvísu vor, var selt á uppboði á tæpar 10 milljónir punda eða um 120 milljónir króna.

George Michael og sambýlismaður hans eru enn sem komið er þeir einu sem hafa lýst áhuga á að kaupa hauskúpuna enda ekki á færi allra að kaupa listaverk á sex milljarða.

Damien Hirst er afar umdeildur listamaður sem er þekktastur fyrir að sýna sundurskornar beljur í formaldehíði, rotnandi dýrshræ og fleira huggulegt. Á sömu sýningu og hauskúpan er sýnd á má sjá málverk eftir Hirst af keisaraskurðsfæðingu sonar hans og krabbameinsæxlum.